CAKAVIANA: RUSKA VEZA

Nono Dinko Santaleza vajka je bi na škerac. Ca god bi reka fameja je pensala da se škerco. Još so mu vervali da je prvo noni Ivanki jime još jeno ženo; ma kada je gono da je za vreme Prve gveri va Rusije jime još ženo i sina. još bi se nasmijo i reka

- Bojži Boh! – pensali so nono se opet škerco.

Se dok pasano leto na vrota neso pokucali…

Alora nono Dinko je bi zarobljen. Kako prižonjer je dela na kampanje za bogato famejo Riminov. Namoro se va njihovo hćer Nino Aleksejevno Riminov.

Brzo je Nina Aleksejevna Riminov zustala noseća i rodila Valentina Dinkijevića. Njejna fameja splašila je Dinka ća i Nino uženila za nekega konta. Nono Dinko je hodeć priša doma. Umra je davno, davno. Jime je preko devedeset.

I pokle toliko let va Labin je prišla Anastazija…

Pranona Nina ni je pravila da konte ni njen pranono, Dinko se zvo, ni bi konte već kampanjol; rojen je ''va Istrine'' rekla je kontesa Nina. Nona se malo zgubila, forši je nešto pomešala, rekla je Anastazija mužu. Lone po lete prišli so Anastazija i Vladimir Vladimirovič Denisovič s decami va Zagreb. Škercala se s vodičkinjo Svetlano kako ni je pranona spominjala pranoneta Dinka Santaleza, ''Istrino'', Istro, ćuti se kako da je prišla doma.

Vodičkinja je rekla da pozno jenega vodiča Santaleza od Santalezi na Labinšćine. Zajno ga je zvola. Vodič Santaleza reka je da ni jime noneta ni pranoneta Dinka ma zno ki je. Va Labine saki sakega zno.

Na vrota so pokucali Rusi.

Pokle sto let fameja je nošla famejo.