CAKAVIANA: BEPIĆ BABIĆ I BOH
Nekada, va Vele šetimone, sodilo se i delalo se do Velega cetrtka. Vervalo se da će baš onda se ca se posodi najbolje viles. Nekada se Glorija ili slava zapirala na Veli cetrtak, vajutro na deset ur. Sa zvona va seh crekvah onda bi zvonila. Va crekve se kantalo ''Slava Bogu na visini''. Se do Vele suboti, do deset ur jutro, zvona neso smela zvonit. Vezalo bi se anke zvonca od bloga, ovoc, kravah i kozah.
Moli Bepić Babić od Veleh Turin to ni zno, a ja, bi je otrok. Zvonili so zvončići od njegoveh ovoc. Baš onda, med Veli cetrtak i Vele suboti, od deset ur do deset ur, poli Veleh Turin je priša pop. Cu je zvončići od ovoc ke je cuvo Bepić Babić.
Ca ne znoš da je Glorija, reka je pop, ca ne znoš da je Boh umra, sada je na miže, pito je pop.
Ne znon, reka je Bepi Babić, neson nanke zno da je bolan.
Bepić Babić dobi je tresko ko je za celi život zapošto.
