CAKAVIANA: MLODE I MLADIĆI
Nino ne zno jušto kada, ma se uženi. Misli da ni prerano. Nima dece. Ni dela deca. Diposti. Njegova eks mloda jimela je dvo, sina, dvojcići. Pa so oni nekako bili i njegovi deca. Za jeno življenje dosta.
Dok je bi mladić Pepiću ženidba ni bila ni na kraj pameti. Preteli so samo za ženit gonali, oni so se uteli ca prvova gojbo se zapret. Kritikali bi ga da je marksist, da je i zonjega, kako i za kumponja Karla Marksa, ženidba nenaravna. Trefilo se obrnuto. Uženi se Pepić prvi od njegove kumpaniji. Ca je ime? Dvajsti šes let. Eks mloda je kriva. Ona je kriva. Rožica je kriva. Rožica je bila idealna žena. Jimeli so srećno življenje. Dve otrocice, lepe i šesne…
Deziderije nikad ni kapi ženske. Cetiri puti je eks mlode ženi. Misli da so mlode, samice, ženske, naravni nepriatel muškeh. I obrnuto… Ingvar (mat mu je od Skandinaviji) anke se cetir puti ženi. Zonjega bušat ženske ni greh, ženske so čisti amor. Bilanca sega tega bušanja: cetiri ženi, šes dece, tri plus tri. Sake suboti nojdo se se Ingvar, se cetire ženi, si deca i nuki. Ingvar je provi socijalista, forši i komuništa.
Drago se uženi za eks mlodo Sido. Pa šo delat va Nemaško. Saki tri meseci torniva bi doma videt famejo, Sido, sina i dve otrocice. (Lufthanka bi mu trebala spomenik dignut.). Samo jedonput je tarno doma pokle por don; kada mu je umrla mola, jimela je samo tri leta, 1966. On i Sida nikad ne so prišli vose. Kako dite more umret?
Jasen. Njegof svet je cirkus. Njegov svet je ženska. Mat, eks mlode, prva žena, druga žena, hći, prva nuka, druga nuka…
Roko se nikad va živote ni namoro. Njemu je to anke bilo cudno. Bilo je otrocicah, spameti hi se; bilo je mlodah ke so mu se pježale. Na neko bi i penso ka put. Ali, za sprovega, ni se, nikad se ni namuro. Namorat se more bit perikolozo, amor more finit grdo, va sebe je psno. ( A more bit i nešto najlepce, lepi moj Roko.)
