CAKAVIANA: ARTEMIDOR

Artemidor je rojen va Efeze, va Turske, današnje Turske. Artemidor iz Daldisa, va Lidije, današnje Turske.

Artemidor i ja smo kolege. Već sada iman više sačuvaneh libret. Pitanje ca će bit za dvo miljari let. Artemidor je piso o tići, kako letijo, i ja son piso o tići; ako je vervat Artemidor je piso i o štroligami. Ocuvano je da je va svoje pisanije spominjo moj rodni grod. Danas moremo štet samo njegovo sanjarico. Jedino antiko sanjarico. I da je spominjo grod va ken i danas živejen.

Artmedior je bi specijalist za sni ki se tarnivajo, ponavljajo. Penso je da se ne treba sna držat kako pijanac lesi.

Jedonput je poli Artemidora priša jedon butižer ka je prodava parfumi.

Lepi moj šinjor Artemidor, reka je butižer parfumi, ako je bogi pomorite.

Pravite ca je, reka je Artemidor.

Sanja son.

Ca ste sanjali? pito je Artemidor

Sanja son lubanjo prez nosa. Ca to znači?

Vi ste butižer?

Ja.

Prodavate parfumi?

Šćeto i dreto.

Onda je lahko. Zgubit ćete delo. Kako butižer ka prodava odori more delat prez nosa.

Ma…parvo je reć butižer.

Nic ma. To ti je tako i bog.

Pokle nekoliko don butižer je nazda priša poli Artemidora.

Ca je sada? pito je Artemidor.

Opet son sanja, reka je butižer.

Ca sada?

Lubanjo prez nosa.

Nopet?

Nopet.

Alora drugi put sanjate sejni sonj. Lubanja prez nosa.

Artemidor je malo penso i reka:

Osramotit ćete se.

Kako? Kada? Zoš?

Znote da je stora užonca da se onemi ki se osramote sece nos.

Ja.

Vi ste sanja lubanjo prez nosa. Vela sramota vas ceka. To ti je tako i bog, reka je Artemidor.

Tako je to i bilo. Butižer je fini va paržone. Prez nosa.

Pokle nekega vremena, prez nosa priša je opet poli Artemidora.

Ca je sada?

Nopet son sanja.

Lubanjo prez nosa?

Lubanjo prez nosa, reka je butižer prez nosa. Nosa ni pa ni.

Smrt vas ceka, brzo će prit poli vas doma. Smrt. To ti je tako i bog.

I bilo je tako kako je Artemidor reka. I bog.