CAKAVIANA: DEKLI I GOSPODARICE

Šinjora D. je Labinjonka. Let i let dela kako dekla poli šinjori B. Kuha obroki, pakuje bagalji, sa šinjoro putuje po svete. O njejne perfektne maneštre i juhi od kamika, pašte s tartufi, lešane govedine s kraljevsko šalđo mlode kozletine s krunpiren, Zdravko Zima piše va librete ''Dnevnik jednog mitomana''. Njejna gospodarica šinjora B. je otrocica Matejuške, alora fetiva Splićanka, ma anke Dubrovkinja, Rimljanka, Parižanka, Mlečanka i Zagrepčanka. Va Parize ima ston poli Seine, na Ile Saint-Louis, va Benecije na Canale della Giudecca, va Provanse živeje va kuće spovednika markiza de Sadea, va Dubrovnike na Kolorine.

Kolorina. Roj. Jednostavno se uklopila. Bila je zima, davnopada je doš. Zgora vali, spoda Lovrijenca grmaci, rovine i zidine, i škulji, šušpetljive, trgogloditske škulji, kako barkoni. Lovrijenac so storili od tega kamika. S ten kamiken bronili so slobodo. Čula je sakokove storiji: tu so zapirali divi breki, ne ne tu so delali tkalci, ma ne ne ne, tu so živele štrigi. Saki kamik je njejni. Nic na zide. Stoli od kamika, pletene kandregi, bele pustelji, se belo. Šoldi za kupit Kolorino posudila je od dvo pretela, bodula, samo oni so imeli šoldi. Rišpeto kamik, naturo, more.

Šinjora T. je anke Labinjonka, s Koromačna. Muž ni je 1989. porti va Meriko, kako turišta. Zostala je soma s dvo deca. Nekoliko puti prvala je dobit vizo, fameja ne more na dve bondi sveta živet. Prišla poli muža preko Kanadi, sa sinen i hćero, skrijeni va kamijone. Parvala je sega, i čistila i kuhala, teško obolela, dok ni postala dekla, bi se reklo osobna asistentica šinjore H., porijeklom od Poljski, teške gospodarice, sa jeno negativno energijo, ka je semi davala otkazi, ma šinjoro T. je zadržala. Puno joj je govorila o sebe, jednostavno jo je prihvatila.Šoferu je više puti pretila da će dobit otkaz ako ne dopeljo šinjoro. T. jedno uro zad ponoćo. Onda je šinjora T. kapila da šinjora H. želi samo kumpanijo. Kada je šinjora prišla zobljiva fameja jo je spravila va njeno kućerino od 28 kamarah, od 2100 kvadrati, na imanje od 0,81 kilometri kvadrati. Šinjora T. je spola poli šinjori H . od ponedeljka do cetrtka, sa još šesnajs delovci, od dekli, do đardinjeri i zaštitari. Šinjora H. bila je joko poredna. Zvoli so je kraljica hoteli i kraljica porednoći. Bila je leto i pol va paržone jer ni plotila tasi. Ne plaćivan i neću plaćivat tasi, gonala je, samo moli ljudi plaćujo tasi. Ignorala je moli ljudi.

Ve dve tri rigice son napiso ne samo zboh dve labinjonske dekli,nego zbog njihoveh gospodaricah, ke so se baren jedonput inbatile. Bilo je to va Dubrovnike. Jenega dneva na taraco Kolorini je prišla šinjora H., kraljica hotelah, vižitat šinjoro B., kraljico tapiserijah. Pogledala saki kuscić kući, steni i more, pa pita šinjoro B.: ''Koliko vo košto?''. Šinjora B. je zmerila šinjoro H. od glovi do peti: ''Šinjora, vi ti beci nimate!''