CAKAVIANA: KUŽINA

Kad biste mogli pitat šinjoru Floru rekla bi van da se trefilo 1965. Jedon koštar noglo je porti ća, zela je drugega. Jeno kamaro je vajka fitala. Na oglas se jovilo desetak mladići. Ćićo ni se na prvo pježo. Đornalista. Naš šlovek, ni furešt. Mat mu je s Premanturi, otac od oca s Kastva. Sejno vecer kada je Ćiću dola kamaro zela je lapiš i horto, hćere Glorije napisala letero, uvizala da je zela novega koštara, mladić je joko ingamba i ot krijonci. Šinjora Flora siguro van ne bi rekla da je rasbokunana će reć divorcijana, soma i dešperana.

Kad biste Glorijo pitali rekla bi van šćeto i dreto da ni ja mat pisala va grod od Dioklecijana kede je bila poli svojega sada ex mladića. Stori koštar noglo je porti ća, dola je oglas, zela je Ćičeta, jenega joko šesnega mladića. Kad se tornala doma mesec don ni videla tega šesnega mladića. Mesec don spoli so kamara do kamari, a nanke jedonput neso se imbatili.Kad so se finalmente trefili va kužine na sebe je imela štupini va vlosah, kremo na lice i flajdo tri broja većo. Zajno ni se zapježo. Onda so počeli gonat. Sake veceri, va kužine šinjore Flori, Ćićo bi pokuca, ona je študijala anatomijo, se bi poli nje, i on je študijo, anatomijo šinjorini Gloriji. Bili so na Vi. Reka je da pozno njenega mladića. Mladić je reka da pozno Ćićeta, da je strasan, da se pravi važan, i smiron tuce. Ni reka da se inamoro se dok ni malo popi. Mladiću je pisala da je nošla novega mladića. Stori mladić priša je va kućo šinjore Flori. Preti da će stuć Ćićeta. Pa ga je Ćićo ze va oštarijo. Finilo je tako da se stori mladić spoveda novemu mladiću, plaka na ramena, gono se najhuje za Glorijo.

Ćićo bi van reka da mu se šinjora Flora joko zapježala, zajno je vide da to ni jena od oneh poredneh gospodaricah. Namoro se prve veceri, dok je još jimela štupini i storo, velo flajdo. Prvo je reka Glorijine zarmone; jeno vecer je prišla poli njega va kamaro, malo so popili, se ni je reka. Kako saka dobra strnišna se je pravila Glorije. Glorija je storila ca je morala storit. Tako so Glorija i Ćićo postali por. Zajno so uvizali šinjoro Floro. Ćićetu je bila fastidja, ze kamaro, pred por meseci je priša, a već va druge kamare s hćero od gospodarice spi. Šinjore Flore je bilo jušto sejno. Samo je vopila: ''Da se ne biš uženila! Nemoj se ženit! Imej jenega mladića, imej drugega, ne importo, lepo fini fakultet, moreš imet i dece, ali muž ti ni potreban, muški samo smetajo.'' Leto don pokle je Glorijo zaprosi. Va kužine so gonali do smrti.