NA 173. ROĐENDANU GIUSEPPINE MARTINUZZI

U utorak 14. veljače 2017. Daniel Mohorović nastupio je na književnoj večeri ''GIUSEPPINI MARTINUZZI U ČAST'', u povodu 173. rođendana labinske učiteljice, književnice i revolucionarke. Glazbeno-poetsku večer organizirala je Gradska knjižnica Labin.

Photo: Gradska knjižnica Labin

Mohorović je pročitao svoju priču ŽIVOTNA ŠKOLA (iz ciklusa pisma netjaku, rukopisa knjige ZAVIČAJNI SVEMIR) u kojoj pripovijeda o dvije žene, majci i kćeri, Tonine Banice i Marije Banice. Publika Knjižnica dobro je reagirala na priču, posebno na:

SEDAM LEKCIJA TETE MARIJE BANICE

1.O djeci

Sedan, ma ne bin danas, po boga. Neke so hi jimele po petnaest, štupide, koko kunići. Znote da to ni bilo lepo. Ca pravite da se neso znali cuvat? So znali so, ma so bili odzoda zabotonani.

2.O braku

Da son mloda, bin se uženila, ma va famejo ne bin šla. Kad son prišla semo va kućo, dobri so mi bili va fameje, ma smo bile dve nevesti i spole smo skupa na šufite. Danas ne bijo otele i pravo bi jimele, nanke ja ne bin više šla. Danas so ti ženski gospi, ne delajo vlosa i da son ja mloda ne bin ni ja vlosa delala.

3.O vjeri

Va crekvo son hodila, ma ne znon ku je boga ili ni, neson ga nikad videla.

4.O zabavi

Ova, pježalo me je toncat, noći i vadne. Huda son bila za tanac. Kad son se zavrtela celi svet je bi moj.

5.O modi

Nosila son suknjo, ma uženila son se va lepe veštalje, dugej. Nosila son i oni veli rećini pak son hi pokle dola za partizani. Anke muški so nosili rećin, bi je veći nego trubac. Danas prave da so mlodi munjeni kad stave jedon rećin. Neka jo, ja njin ne zamerin. Neka se diverte, neka gredo va čine i va tanac i kamo ćejo.

6.O prošlosti i sadašnjosti

Viš danas je se na drugo fozo. Vi ste lepo osnožene, operene, piturane, a mi smo bile piturane zemlju. Jutro nan se ni nanke robilo oprat, smo bile operene od pota.

7.O šoldima

Ca će van vraga beci, tar se špendojo koliko ih je. Dokle jiman smiron špendivan i don ća. Kad ne buden jimela, će mi dat deca.